Meghalaya : Central probe team-in NEHU thleng

Member pahnih awmna Ministry of Education aṭanga fact-finding team chuan Pathianni, November 24,2024 khan North-Eastern Hill University (NEHU) an thleng a, vice-chancellor Prabha Shankar Shukla-a'n a mawhphurna a hlen zawh lohna leh a hna a tlin lohna laite an chhui dawn a ni.

He committee-a member pahnih hi UGC chairman Prof DP Singh leh Assam University vice chancellor hlui Prof Dilip Chandra Nath te an ni a, zirlai hruaitu NEHUSU leh KSU NEHU Unit te nen Thawhṭanni khan inbiakna an nei nghal.

Hei bakah hian university-a stakeholder hrang hrang, faculty leh non-teaching staff te nena inbiakna neih tura ruahman a ni bawk a, anni nen hian campus chhung building infrastructure an endik ang.

Ministry hian an team hi ni 15 chhungin endikna hi zo hman turin ti mah se November 15 khan thupek hi an chhuah chauh thung a, hei vang hian an thil hmuhchhuah hrang hrang dahkhawm a report kimchang thehlut tur hian ni hnih chhung chauh an nei dawn ta a ni. Ngunthluk taka an thil chhuizui ber chu thawktu an lak dan chungchang te, campus chhung infrastructure ngaihthah, university ranking ngaihpawimawh loh leh Vice-Chancellor in a mawhphurna a hlen zawh loh te an ni.

Meghalaya High Court chuan he chhuizuina hi enfiahin, December 6 hian hearing neih tura ruahman a ni. Chief justice IP Mukerji leh Justice B Bhattacharjee chuan committee report, fuihna leh hma lak dan tura rawtna awm ang ang te an lo nghah thu an sawi bawk. NEHU-a buaina thleng mek chuan he team thil hmuhchhuah aṭang hian kawngro a sut ngei beisei a ni.