Manipur: School leh College hawn a ni

Manipur khawpui Imphal leh Jiribam district-a school leh college chu kar khat chhung khar a nih hnuin nimin, November 25, Thawhṭanni khan hawn an ni leh ta.

Tualchhung buaina leh inbeihna thleng vangin zirna in te hi hun eng emaw chen khar an ni. Mahse directorate of education chuan thuchhuah siamin, nimin aṭang khan sorkar school, sorkar hnuaia mimal leh central school te chu class pangngai a kal leh tawh turin a ti a ni.

Higher leh technical education department chuan thupek hrang siam bawkin, sorkar school zawng zawng bakah sorkar hnuaia college leh university zawng zawng chu November 25 aṭang hian zirna pangngai chhunzawm leh tawh turin a hriattir. Tun hnaia buaina chhuah tharna hmunte hi Imphal West, Imphal East, Thoubal, Bishnupur, Kakching leh Jiribam te an ni.

Buaina chhuak thar avanga mipui chhuah khapna thupek siam pawh thlah dul a ni a, zing dar 5 aṭanga chhun dar 12 thleng mipuite chu an mamawh lei tura chhuah phalsak an ni.

Kuki MLA-te chuan state chhunga boruak ṭha leh ralmuang a awm theihna tura inbiakna nei turin thuneitute an ngen. State sorkar chu buaina chhuak a hmachhawn danah thlei bik nei nia puhin, sipai hnena thuneihna sang pekna, Armed Forces Special Powers Act (AFSPA) pawh chu ennawn leh turin an phut bawk. Kuki MLA-te hian state sorkar leh sorkar laipui chu inbiakna nei thuai turin an phut a ni. Kuki MLA 10 zigah hian BJP MLA pasarih an awm.