Manipur: Manipur Police te inhnukdawk

Manipur Police team ten dan phal loha Kangpokpi district-a opium chinna hmun tihchhiat tuma darkar thum lai kea an kal hnuin, tu tih hriatloh ralthuam keng mi 80-90 velin an lo ti dinga,hei vang hian an force hi an inhnukdawk leh tih police officer chuan first information report (FIR) an ziah luhah an tarlang.

Ralthuam kengte hian opium chinna hmun an ti chhia a nih chuan police team member zinga mi thah an hreh loh thu an sawi tih an tarlang bawk. Hmun hla leh tlawhpawh loh anih bakah thlen zung zung theih a nih loh vangin dan phal loha opium chinna hmun pawh tichhe loin tlai dar 3 ah an inhnukdawk ta a ni.

Police team hi mi 25 an nih bakah Liangmai Naga tribe aṭangin volunteer te leh driver panga an tel a ni.

An team hian assault rifle pathum chauh kengin opium chinna hmun tichhe tur hian an pan a ni. Ralthuam ken paha opium chinna hmun tihchhiat chu henglai hmun chhengchhia ah phei chuan a harsat thu an sawi a, thuneitu lamin police rual hian force dang tirh belh ni thei se tih rawtna a awm bawk.

Police team te hi an tlem tham avangin leh ralthuam keng ten an silai laksak an tum vangin an inhnuhdawh mai a ngai ta a ni. Hmun fal leh tlawhpawh ngai loh a nih vangin hma la tur chuan hun rei tak hman a ngai dawn a, team te him nan he thutlukna hi an siam ta tih FIR ah an tarlang.

Kangpokpi police in chief chuan November 18 khan Kangpokpi- a officer in charge G Saparmeina police station ami te chu Makhan tlanga opium chinna hmun tichhe tur hian thupek a pe tih chanchinthar lakhawmtuten an sawi. Helai hmun hi G Saparmeina huamchhung niin Imphal aṭanga km 35 vel a ni bawk.