Assam-a Covid Care Centre khar vek tawh

Assam sorkar chuan state chhunga Covid-19 hri kai an tlakhniam zel tawh avangin hri kaite enkawlna tur siam, Covid Care Centre leh temporary shelter a siam zawng zawngte chu a khar tawh. 

Health and family welfare minister Himanta Biswa Sarma chuan Covid-19 kaite chu  Guwahati Medical College and Hospital (GMCH), Mahendra Mohan Choudhury Hospital (MMCH) leh Kalphar-a Covid Care Hospital-ah enkawl an ni tawh tih a sawi.

November thla chhung khan hri kai hmuh chhuah thar hi an tlahniam chak hle a, thla tawp kara hri kai hmuh chhuah hi 158 chauh an ni tawh a ni. Hri kai hmuh chhuah thar zinga a tam zawk hi airport leh rel

station-a hmun dang aṭanga lut turte an ni. Minister chuan state chhunga hri leng chu an thunun thei tawh tih sawiin, hri kai an hmuh thar zinga tam zawk pawh state pawn lam aṭanga lut turte an nih avangin airport leh rel station-ah te erawh uluk taka enfiah zel an nih tur thu a sawi a ni. 

Assam-a hri kai enkawl mek hi 3,350-ah a tlahniam tawh a, hetih lai hian health department chuan hri darh tur venna atan sample test a tam thei ang a nei mek reng a, ni khatah sample 20,000 - 25,000 inkar test hi an la nei ziah a ni.