Meghalaya: MSCW in campaign huaihawt

International Day for the Elimination of Violence against Women denchhenin Meghalaya State Commission for Women (MSCW) chuan Thawhṭanni khan campaign a huaihawt.

He campaign hi December 10 thleng neih tur a ni a, hmeichhiate chunga tharum thawh duh loh tarlanna a ni. Campaign hi state khawpuia neih niin roadshow hi Nongthymmai aṭanga Don Bosco Square, Laitumkhrah-ah neih a ni bawk.

MSCW campaign hi December 10 thleng neih a ni anga, hemi ni hi International Human Rights Day niin hmeichhhiate dikna leh mihring dikna chu a inzawm tlat tih entirna tura an tih a ni bawk.

Meghalaya ah hian hmeichhe chunga pawikhawihna thleng hi a pung nasa hle a ni. Tun dinhmunah chuan Meghalaya-ah hian Indian Penal Code (IPC) hnuaiah hmeichhe chunga pawikhawihna case 855 awmin, 2023 khan Special & Local Laws (SLL) hnuaiah case 339 ziah luh a ni.

Case zingah hian pawngsual case 670 awmin pawikhawihtu man hi mi 24 chauh an awm thung a, chhungkhat hnai leh pasal te tihduhdah tuar case 154 ah case 142 chu tihfel lohin a awm bawk. Rukbo case 131 chu tih fel loh a nih bakah hmeichhe chunga mawi lo tak taka chetna case 483 awmah 451 chu chinfel loh an ni.

Protection of Children from Sexual Offences (POCSO) Act hnuaia case 1,790 ah 108 chauh tih fel a ni bawk. 2023 khan pawngsual case 24 chauh chinfel a ni a, a dang 18-ah chuan pawikhawihtute thiam chan tir an ni thung.

He campaign hi rorelna dik a awm theih nan leh pawikhawihtute hrem loha an chhuah loh nan te, Meghalaya hmeichhiate zalen leh him taka an awm theihna tura au chhuahna tura ruahman a ni.