AP: Rang Mahotsav Festival Ambassador atan actor Pankaj Tripathi ruat

Bollywood lemchanthiam hriat hlawh tak, Pankaj Tripathi chu Arunachal Rang Mahotsav 2024 (ARM '24) Festival Ambassador atan ruat a ni.

Tripathi hi Belsand, Gopalganj, Bihar mi niin tunah chuan India rama lemchanthiam lawm hlawh ber pawl a ni tawh a, National School of Drama (NSD) aṭanga in zirchhuak a ni. Arunachal Rang Mahotsav 2024 Festival Ambassador atana thlan a ni chu a lawm thu sawiin, Theatre in a nuna hmun pawimawh a luah thu te a sawi a, art lama a inhman ṭanna atana zirtirtu pawimawh tak a nih thu a sawi bawk. Rang Mahotsav chu theatre thil theihna leh Arunachal hnam ziarang leh an hausakna tarlanna a nih thu a sawi bawk. He platform-ah hian traditional leh contempory mai ni loin khawvel hmun hrang hrang aṭangin an thiam thil entir a ni ang.

He festival hi hmarchhak biala international theatre festival lian ber ni tura ruahman a ni a, proscenium theatre, street play leh intimate stage production pholanna hun an nei dawn bawk a ni.

Arunachal Rang Mahotsav 2024 hi ni 15 chhung hman tur a ni a, November 22 khan hawn niin, December 5 thlenga hman tur a ni. A lawmna hunah hian Arunachal Pradesh artistic heritage hmuhnawm tak tak pholan a ni ang. ARM '24 ah hian oral folklore, traditional dance form leh martial art hmuhnawm tak tak entur a awm dawn bawk.