Manipur : Meitei hmeichhia ten sit-in protest nei

Manipur-a Kanto Sabal khua leh khaw ṭhenawma hmeichhiate chuan November 27, 2024 khan 57th Mountain Division Army Camp, Leimakhong aṭanga November 25-a mak taka bo, Laishram Kamalbabu him taka hmuh kir leh ngei phutin sit-in protest an huaihawt.

Sit-in demonstration hi Joint Action Committee (JAC) kaihhruainaa neih a ni a, Leimakhong Army Base Camp panna kawng pawh an dang a ni. November 29 hma ngeiin Kamalbabu hi a chhungte hnena him taka a kir leh theih an phut a, an thil phut tih hlawhtlin a nih loh chuan a aia nasa zawka lungawi lohna lantir an tum.

Kamalbabu, kum 56 mi hi Gosaipur Cachar mi niin military camp-a hnathawh viltu a ni a, a unaupa chenna in Loitang Khunou-ah a khawsa ṭhin. JAC member Lourembam Anita chuan army official-ten a bo dan chu hriatchian mai theih a nih loh thu an sawi niin a tarlang a, venhimna khauh tak huam chhunga awm, mak taka a bo dan chu a rinhlelhawm hle tih sawiin Manipur High Court ah petition an thehlut tawh thu a sawi.

Hetih mek lai hian Kamalbabu te khua, Gosaipur-ah public meeting neih niin sorkar laipui leh state sorkar bakah Indian Army te chu zawn hna uluk zawka nei turin an ngen. Meeting-ah hian Assam Chief Minister, bialtu MLA, Deputy Commissioner leh Police Superintendent te hnenah memorandum thehluh tura ruahman niin Manipur sorkar nawr turin an phut. Leimakhong hi Imphal aṭanga km 16-a hla niin Imphal West leh Kangpokpi district ramria awm a ni.