Meghalaya High Court-in khawlai ui awmna tur siamsak turin ti

Meghalaya High Court chuan state sorkar leh Shillong Municipal Board hnenah thu thlenin khawlai ui (street dog), awmna tur nei lo tan an tawm hulna tur siamsak turin a ti.

Chief justice I.P Mukerji leh Justice W. Diengdoh awmna division bench chuan khawlai ui leh Shillong Zoo chungchanga Public Interest Litigation (PIL) pahnih lutte an ngaihtuah hnuah he thupek hi an ti chhuak a ni.

Khawlai ui, tawmhulna tur nei lo an pun nasat thu sawilangin, Court chuan ui seh leh ui a seh vanga nunna chan tam tur ven nana a tih a ni bawk. Hetih mek lai hian Shillong Municipal Board counsel chuan ui hnena vaccine pek leh natna hrik laka tih thianghlim hna an kalpui mek thu an sawi a, an tawmhulna tur hmun an tlakchham avang erawh chuan buaina an tawk mek thung niin a tarlang. Tun dinhmunah chuan khawlai uite chu man khawmin an chiu bakah tih thianghlim an ni a, hemi hnu hian khawlaiah an chhuah leh mai ṭhin a ni.

State counsel chuan court hnenah hian Shillong sahuan chu June 2024 khan Meghalaya State Zoo sak thar, Shillong aṭanga km 35 ah sawn a nih tawh thu an thlen bawk. He sahuan tharah hian veterinary hospital awmin qualified veterinarian ten an awmchilh bawk a ni. Ramsa zingah hian sakhi no pai leh sava tih loh chu helai sahuan tharah hian an sawnlut deuh vek tawh a ni. Sava te chu an awmna tur siam zawh a la nih loh vangin sawn hun a tlai phah ta a ni.

Court chuan sahuan sawn chungchanga sorkar hmalakna chu a ṭhain a lungawithlak thu a sawi a, khawlai ui te pawh an awmna tur siamsak vat a ṭul thu an sawi bawk.