Assam: Demo Farm Lab hawn a ni

Prime Minister's Development Initiative for the North East Region (PM-DevINE) scheme hnuaia siam, Demo Farm Lab and Training Center chu Dr. Arun Kumar Sarma, Director General, North East Center for Technology Application and Reach (NECTAR) chuan Nilaini khan a hawng. He hunah hian loneitute nen inkawmna hun siam tel a ni nghal a, organic farming pawimawhna leh stakeholder ten an tawnhriat sawina hun an nei bawk.

Dr. A.K. Yadav (Chief Consultant, MOVCD-NER), Dr. Usha Dixit (Scientist-F, AI Division, Department of Science and technology), bakah scientific leh agricultural institution aṭanga mi challang tak takten an telpui. NECTAR aṭang hian senior official leh researcher - Dr. Krishna Kumar, Shri Simon Phukan leh Dr. Biman Chandra Barua pawhin he hun hi an hmanpui bawk.

NECTAR hi "Promoting Scientific Organic Agrilculture in North East' project tana sulsutu niin hmarchhak bialah organic clusters 250 din an tum. He hma lakna hmang hian master trainer 250 leh loneitu 25,000 te tan organic agriculture lamah traning pek tum a ni. He project pawimawhna ber chu Demo Farm Lab hi niin organic farming lama tui mi tan thiamna hrang hrang an zirtir dawn bawk.

Demo Farm Lab-ah hian lei ṭhat leh ṭhatloh tehna 'Vasundhara' a takin a hman theih dawn a, he khawl hi Bhabha Atomic Research Centre siam NECTAR hnena an hlanchhawn a ni. He khawl hmang hian loneitute chuan leia carbon awm zat leh pH level an hre thei dawn a ni.