Tripura-in AFSPA hlih a remti

Tripura-a Left Front sorkar chuan an state-a sipaite hnena thuneihna sang pekna dan, Armed Forces Special Powers Act (AFSPA) chu Nilaini khan hlih a remti.

Helpawlte tharum thawhna leh pawi­khawihna hluar ven nan Tripura sorkar chuan kum 1997, February 16 khan AFSPA hi a lekkawh ṭan a ni.

Chief Minister Manik Sarkar chuan Nilainia cabinet meeting-ah he thutlukna hi siam a ni a ti a, firfiak chetna chu khuahkhirh a nih tak avangin minister te ṭhukhawm chuan state pumah AFSPA hlih a rel ta a ni, a ti.

"Tripura-a dan leh thupek dinhmun te hi sorkar laipui official, security force te leh state official te chuan an ennawn reng ṭhin a, security force te'n tun hnaia review meeting an neiha report an buatsaih chu state council of minister-in a ennawn hnuah AFSPA hlih a remti a, AFSPA hlihna thuchhuah siam turin Union Home Ministry-ah rawtna thlen nghal tum a ni," a ti.

AFSPA hi puan a ṭul a nih chuan state Governor leh sorkar laipuiten thuchhuah siamin an puang thei a ni.

February 16, 1997-a AFSPA lekkawh a nih aṭang khan thla ruk ral hnuah ennawn ṭhin a ni a, nikum November khan ennawn hnuhnung ber neih niin, thla ruk dang pawhsei a ni a, tun thla tawp hi a hun tawpna a ni.

Tripura Chief Minister chuan, "Tun hnai khan AFSPA pawtsei leh tura rawtna sorkarin a dawng a, hemi hnu hian dan leh thupek dinhmun leh firfiaka helte chet dan chungchangah security agency hrang hrang chu report buatsaih turin kan ngen nghal a, security agency te pawhin AFSPA hlip tura kan rawtna chu min pawmpui ta a ni," a ti.

Sarkar chuan Tripura-a helte chetna chu khuahkhirh an nih tawh thu sawiin, AFSPA hlip tura pawl hrang hrang ngenna chu sorkarin level hrang hrangah a ngaihtuah ṭhin tawh thu leh security force te pawmpuina an neih theih ṭhin loh avanga a hmaa hlip lo an ni, a ti.

Home portfolio changtu, Sarkar chuan a tirah AFSPA lekkawhna hian state chhung police station zawng zawng aṭanga hmun thuma ṭhena hmun hmun hnih a huam thu a sawi a, a huam chhung chu sawr zim zel a ni, tiin a sawi.

Tun dinhmunah police station 26 huam chhungah AFSPA hi lekkawh a ni mek a, police station pali huam chhungah thlah dul a ni. Tripura-ah hian police station 74 leh police out post 36 a awm.

Tripura bakah hian AFSPA hi Assam, Nagaland, Manipur leh Arunachal Pradesh district ṭhenkhatah la lekkawh a ni a, AFSPA lekkawhna huam chhung hi 'disturbed area'-a puan niin, helte beih kawngah sipaite chu thuneihna sang tak pek an ni.