Assam-in central aṭangin vbc 200 dawng dawn
Sorkar laipui chuan Assam-a infrastructure project kalpui nan cheng vaibelchhe 200 a pek tur thu a puang a, hemi rual hian hmarchhak biala Organic Farming Mission kalpui nan cheng vaibelchhe 125 a ruahman thu a puang bawk.
Development of North Eastern Region (DoNER) Minister Jitendra Singh chuan he thu hi Nilaini khan Guwahati-ah a sawi a, Assam-a infrastructure project kalpui turte hi water supply scheme leh inkalpawhna kawgpui project a ni tih a sawi.
"Assam tan infrastructure project cheng vaibelchhe 200 hu kan kalpui dawn a, heng project te hi Assam mamawh ngaihtuaha duan a ni a, state sorkar thil ngaihpawimawh te an ni," a ti.
DoNER Minister Singh chuan hmarchhak state zawng zawnga Organic Farming Mission kalpui nan cheng vaibelchhe 125 ruahman a ni tih a sawi bawk a, organic mission chu Gujarat-a Anand cooperative model anga kalpui a nih tur thu leh a kaihhnawih ministry te'n rawtna an siam theih nan detailed project report (DPR) pawh thawn an nih tawh thu a sawi.
Organic mission chu thei leh thlai thlanchhuah bikah chauh kalpui ṭan a nih tur thu leh a ṭul anga thil dang tihbelh zel a nih tur thu a sawi bawk.
DoNER Minister chuan a ministry-in ‘Act East Policy’ tihchangtlun nan sorkar laipuiin ‘Make in India’ a kalpui zulzuiin ‘Make in North East' model a duan thu leh, hmarchhak bial inkalpawhna kawngpui ngaihtuah turin Road Corporation siam tuma hmalak mek a ni, tih a sawi.
Assam Chief Minister Tarun Gogoi nen meeting an neihah Singh chuan Guwahati-a, Lokpriya Gopinath Bordoloi International Airport tihchangtlunna tur chu Union Civil Aviation Ministry-ah thlen thuai tum a ni, a ti.
"Nagaland leh Delhi inkarah direct flight kan thlawh tir tawh a, tunah hian Delhi leh Mizoram inkarah direct flight thlawhtir tumin hma kan la mek a ni," tiin a sawi bawk.
Langtlang taka inrelbawlna kalpui kawngah DoNER ministry website chu changtlung taka siam a nih thu a sawiin, mipuite'n rawtna leh ngaihdan an thawh theih nan website-ah toll free number tarlan a ni, a ti.