Manipur MLA pathum nihna hlihsak

Manipur assembly speaker Th Lokeswar chuan Nilaini khan Manipur State Trinamool Congress party MLA pathum te chu MLA nihna a hlihsak.

Manipur State Trinamool Congress Committee (MPTCC) chuan state assembly member 60 awmnaah MLA pasarih a nei a, party chhunga buaina vangin MLA pathumte hi party duh dan kalha hma laa puhnaah thiam loh chantir an ni.

MLA pathumte hi - Th Biswa­jit Singh, O Lukhoi Singh leh Kh Joykishan Singh te an ni a, State Legislative Assembly Speaker kaihhruaina hnuaiah assembly tribunal chuan an chungthu hi thla riat zet a ngaihtuah hnuah MLA nihna a hlihsak ta a ni.

Trinamool Congress MLA pathum te hi India dan­pui, Article/191(2) leh Tenth Sche­dule Para 2(1) (a) tlawh­chhanin thiam loh chantir an ni.

Kum 2014 Lok Sabha inthlan neih zawhah Manipur Trinamool Congress party chhungah har­satna a thleng zui nghal a, party MLA Kh Joykishan chuan state party president Kim Gangte chu a nihna aṭanga paihthlain party president-ah a inruat a, hemi hnu hian MPTCC chuan Shyamkumar chu president atan a ruat leh a ni.

Shyamkumar hian party MLA hel, Kh Joykishan Singh leh Th Bishwajit Singhte lakah hian nikum June 26 khan Manipur Legislative Assembly secretary hnenah thubuai thehlut a, July 4 khan party MLA pathum- K Sarat Singh, M Kunjo Singh leh O Lukhoi Singh te lakah thubuai a thehlut leh a, mahse M Kunjo Singh-a thubuai erawh a hnukdawk leh thung.

All India Trinamool Cong­ress (AITCC) general secretary Mukul Roy pawhin nikum June 12 khan party MLA paruk- M Kunjo, Dr I Ibohalbi, K Sarat, Kh Joykishan, O Lukhoi leh Th Bishworjit te hi party aṭangin a suspend a, Dr I Ibo­halbi suspend-na hi June 27 khan hlih a ni leh a, party aṭanga M Kunjo suspend-na pawh August 9 khan hlih a ni bawk.

Hemi hnu hian MPTCC president Shyamkumar chuan K Sarat Singh laka Assembly secretary hnena thubuai a theh­luh hi a sût leh a ni.