High Court-in bandh chung chang media-a chhuah a khap
Meghalaya High Court chuan tlawmngai pawl leh pressure group te'n bandh, kawngzawh, kawngpui danchah leh nawrh an huaihawt ṭhin chungchanga thuchhuah an siam thehdarh kawngah media te a khuahkhirh.
Meghalaya DGP Rajiv Mehta chuan Hynniewtrep National Liberation Council (HNLC) te'n tun hnaia bandh an huaihawt chungchangah media te khuahkhirh turin Meghalaya HC a ngen a, Chief Justice Umanath Singh leh Justice T Nandakumar Singh te awmna bench chuan hemi chungchang hi ngaihtuahin dan phal loha nawrh huaihawt chungchanga pawl hrang hrangte thuchhuah chu thehdarh lo turin media te an hriattir.
"HNLC emaw pawl dangte'n mipuite nunphung tikhaihlak thei thil leh India danpui Article 19 leh 21-a khua leh tuite dikna chanvo palzutna lam, bandh, kawngzawh, kawngpui danchah leh nawrh an huaihawt chungchanga thuchhuah an siam a nih chuan print emaw electronic media-ah tihchhuah tur a ni lo," tiin Meghalaya HC thuchhuak chuan a tarlang.
A thuchhuak hi an palzut a nih chuan Meghalaya HC chuan a bawhchhetute chungah Contempt of Courts Act tlawhchhana thubuai a siamsak tur thu a tarlang bawk a, court thuchhuak palzuttu chungah state sorkar chu dan tlawhchhana thubuai siam ṭhin turin a hriattir bawk.
High Court chuan mipuite rilrua hlauhna awmte tihbo nan Shillong-ah para-military forces te Flag March neihtir a rel bawk a, hemi kawngah hian state sorkar chu district thuneitute thawhpui turin a hriattir bawk.