Gogoi leh Harsimrat-i'n Food Park an hawng

Assam Chief Minister Tarun Gogoi leh Union Minister of Food Processing Industries Harsimrat Kaur Badal chuan Ningani khan Assam, Nalbari district-a Nathkuchi-ah North East Mega Food Park an hawng.

Hawnna inkhawmah hian Union Minister of State for Home Kiren Rijiju pawh a tel. Gogoi chuan thu sawiin, Assam-ah processed food mamawhna a san thu a sawi a, food processing park thar chuan thlai leh thei kal ral tur a ven theih ngei a beisei thu a sawi.

Union Minister Harsimrat pawhin thu sawiin, eitur sawngbawlna lama Prime Minister Narendra Modi-a'n Thailand leh Malaysia hnungzuia ruahmanna a siamte a tarlang a, sorkar laipui chuan North East Mega Food Park siam nan financial assistance cheng vaibelchhe 50 a pek thu a sawi.

Food park chu loneitute'n thlai leh thei an tharchhuahte an tihralna tur hmun a nih thu sawiin, food park-a thlai leh thei sawngbawl tur lakkhawmna hmun pawh district panga - Sivasagar, Karbi Anglong, Sonitpur, Darrang leh Kokrajhar-ah hawn a nih tur thu a sawi bawk.

North East Mega Food Park hi cheng vaibelchhe 250 senga din a ni a, kum khatah cheng vaibelchhe 400 aṭanga 500 thleng sum lut leh chhuak a awm theih beisei a ni.