Naga CM-in special status pek chhunzawm a dil

Nagaland Chief Minister T.R Ze­liang chuan special category status chu tihtawpsak lo turin sorkar laipui a ngen.

NITI Aayog meeting vawi thumna, Chief Minister sub-group te'n Ningania, Bhopal-a an neihah Zeliang chuan special status pek chhunzawm zel dilin, Nagaland special status chu kum 1960-a, Naga People’s Convention leh sorkar laipuiin '16-Point Agreement' an ziahah a tel a ni, a ti.

Meeting-ah hian Nagaland Chief Minister chuan Normal Central Plan Assistance (NCA) bakah NLCPR leh NEC kaltlanga sorkar laipuiin state te hnena fund a pek chu tihtawp a nih dawn chuan Centrally Sponsored Schemes (CSS) fund chu 100% sorkar laipuiin tum se tiin rawtna a siam.

NITI Aayog chu hmarchhak bial tan ruahmanna rintlak siam turin a ngen bawk.

NITI Aayog hnuaia Chief minister sub-group convenor, Madhya Pradesh Chief Minister Shivraj Singh Chouhan chuan Chief Minister dangte pawhin CSS fund chu state tinte mamawh dan ang zela ruahman an duh thu a sawi.

Chief Minister sub-group mee­ting chuan central scheme kalpui tur aṭang­in state tinte chu an mamawh azira duhthlanna siamsak an rel a, scheme ṭhenkhat an mamawh loh chu hnawl thei tura zalenna siamsak an duh bawk.

Nagaland telna Chief Minister sub-group meeting hi June 13-ah a tawpna atan neih a ni leh ang a, rawtna an siamte chu NITI Aayog Chairman Prime Minister Narendra Modi hnenah June 20 hian thlen a ni ang.

Sub-group-ah hian Zeliang leh Shivraj Singh Chouhan bakah Ommen Chandy (Kerala), Nabam Tuki (Arunachal Pradesh), K Chandrashekhar Rao (Telangana), Raghubar Das (Jharkhand) leh Andaman and Nicobar Lieutanant Governor A K Singh te an tel.