Village Administration Bill : Governor-in bill a pawmpui loh chuan chaw ka nghei zel ang: Nongrum

Khasi Hills Autonomous Dis­trict Council (KHADC) Chief Executive Member (CEM) hlui Adelbert Nongrum chuan Village Administration Bill-ah Meghalaya sorkarin Governor pawmpuina a la thuai loh a nih chuan chaw ngeia nawrh chhunzawm zel a tum thu a sawi.

Nongrum hian Shillong Civil Hospital bulah May 16 aṭang khan chaw ngei a ṭan tawh a, hetihlai hian Meghalaya High Court chuan khawtlang/veng hruaitu (Rangbah Shnong) te thuneihna a hlihsak chungchanga court thutlukna a lo sawisel avangin thubuai siamsakin, May 18 khan man a ni a, May 19 khan ngaihdam a dil hnuah bail a chhuahtir a ni. Contempt of Courts Act, section 14 tlawhchhana HC-in thubuai a siamsak chungchangah hian June 15 hearing neih a ni leh ang.

State sorkarin Village Admi­nis­tration Bill a tihkhawtlai chung­changah Hynniewtrep National Liberation Council (HNLC) chuan May 27 khan bandh a lo huaihawt tawh a, zan lamah kar khat chhung kawngpui dangchah a huaihawt bawk.

Village Administration Bill hi Khasi mite khawtlang nun phunga khua/veng hruaitute thuneihna dan hnuaia pawmpuina tur a ni a, nikum July thla khan KHADC chuan a pass a, Governor pawmpuina la turin state sorkara a thawn a ni a, mahse state sorkar chuan a la tikhawtlai rih thung. Bill hi Jaintia Hills Autonomous District Council (JHADC) pawhin a pass bawk.

District Council Affairs (DCA) Minister HDR Lyngdoh chuan tunhnai khan bill chu sorkarin a bawhzui mek tih sawiin, Nongrum hi chaw ngei chawlhsan turin a ngen a ni. Mahse Nongrum chuan KHADC leh Jaintia Hills ADC te'n bill an lo pass tawh chu tihdanglam a duh loh thu sawiin, chaw ngei chhunzawm zel a tum thu a sawi.

State sorkar chuan hemi chung­changah hian Nongrum hnenah lehkha a thawn bawk a, KHADC and JHADC CEM te nen meeting an neih tawh thu leh ADC pahnihte bill pass tawh chu a tlang theih nan state sorkarin theihtawp chhuahin a bawhzui mek tih a tarlang.