Arunachal Pradesh sorkar leh ITBP in MoU ziak

Arunachal Pradesh sorkar chuan farm aṭanga thlai thar chawi lar leh, mipuite khawsak dan chawikanna kawnga thawhpui turin Indo-Tibetan Border Police (ITBP) chu Memorandum of Understanding (MoU) a ziahpui.

Thawhdunna tur, MoU an ziah rual hian Mission Arun Himveer pawh an hawng nghal a ni.

ITBP thawhpuina tur hi Arunachal Pradesh Agriculture Marketing Board (APAMB) nena ziah niin, he hmalakna hian tualchhung mite leh ITBP inkarah pawh thawhhona ṭha leh chak zawk a siam ngei tur thu chief minister Pema Khandu chuan a sawi. "Ramria chengte chu ramchhung venghimtute an ni," a ti.

CM Khandu chuan a official social media X ah pawh hemi chungchang hi tarlangin, a hma chuan market lamah inthlunzawmna ṭha an neih loh avangin loneitu thawkrim tak tak ten an thlai thar hralhna tur mumal an nei lo a, hei hian loneitute beidawnna a thlen bakah an thlai thar pawh a chhiat nasat thu a sawi bawk. ITBP nen an thawhdun chuan state pawn lama market nena inthlunzawm kher a ngaih dawn lo a ni, tiin a sawi.

An hmalak dan tur chungchangah hian a hmain prime minister Narendra Modi leh a team hnenah rawtna pawh an lo thlen tawh a, tunah chuan a hlawhtlinna an hmu ta a ni. He thawhdunna hmang hian ITBP loneitute hnen aṭangin thlai tharlam, tualchhung thar ngei chu an lei chhawng tawh dawn a ni. Sorkar, loneitute leh ITBP ten hamṭhatna an nei thei vek dawn ta a ni.