ILP issue: Meghalaya CM leh Amit Shah inbe dawn

Meghalaya chief minister Conrad Sangma chuan Meghalaya-a Inner Line Permit (ILP) system hman an phut chungchangah, union home minister Amit Shah chuan Republic Day lawmna a zawh hnua be turin a hrilh tih a sawi. 

Conrad Sangma chuan kar liam ta chhung khan Amit Shah hi ṭum hnih a be tawh tih a sawi a, mahse Republic Day lawmna tura an in­buatsaihna velah a ṭul em avangin January 26 hnu lama inbe chhunzawm leh mai turin a hrilh thu a sawi a ni. 

Amit Shah nen meeting hi an neih theih thuai a beisei tih sawiin, Meghalaya CM chuan ILP chungchang bakah an state chhunga dan leh thupek dinhmunte pawh sawipui a duh thu a sawilang bawk. 

Parliament-in Citi­zenship (Amend­ment) Bill pass a nih hnuah, Meghalaya hian he danin an state pum a huam ve lohna turin ILP system hman ve an phut a ni. Meghalaya assembly pawhin sorkar laipui chu ILP hmantir thuai tura nawrna tur resolution pawh an lo pass tawh bawk.