Tripura HC-in doctor clinic hawn hun a bithliah
Tripura High Court chuan sorkar doctor te mimal clinic chu working days-ah darkar thum thleng chauh hawn a phalsak a, sorkar chawlhah darkar ruk thleng hawn a phalsak bawk.
High Court chuan sorkar doctor te chu private hospital, nursing home leh laboratory-a thawh kawp a phalsak lo bawk.
Chief Justice Deepak Gupta leh Justice Subhasish Talapatra te awmna division bench chuan kar kalta Zirtawpni khan he thuchhuah hi an siam a ni.
Tripura Health Department official chuan HC thuchhuak hi sawiin, doctor mimal clinic-a inentir damlote chuan an vawi khat kalah doctor rawn man cheng 200 an pe ang a, a vawi hnihna aṭangin cheng 100 zel lak tur a ni, a ti a, damlote hnenah hian receipt pek zel tur a ni ang, a ti.
Tripura-a sorkar doctor te private hospital, nursing home leh laboratory-a thawk kawp an tam lutuk avangin HC chuan nikum khan 'suo moto' case siamin, hemi chungchang hi a ngaihtuah ta a ni.
Health service rules ang chuan doctor te hi private practice phalsak an ni a, mahse khuahkhirhna dan pelin an kal ṭhin a ni, tiin health official chuan a sawi.