Mao Naga leh Angami Naga inkarah inhriatthiamlohna

Manipur leh Nagaland ramri biala Dzukou leh Kezoltsa ram inchuh thubuai kaihhnawihah Manipur-a Naga hnam, Mao leh Nagaland, Kohima district-a Angami Naga mite inkarah inhriatthiamlohna a thleng a, Southern Angami Youth Orga­nisation (SAYO) chuan Mao mite ei leh bara hrek tumin kar kalta Zirtawpni aṭang khan kawngpui an dangchat.

Manipur-a Mao Naga mite chenna bial, Senapati district tlawhtu kawngpuite chu Angami mite hian an danchah sak a ni.

Mao Council chuan Dzukou valley-a an ram chu Angami te hian an luahsak tiin an puh a, mahse Angami te hian Mao mite Nagaland ram chuhpuiah an puhlet thung.

Southern Angami Public Organisation (SAPO) thuchhuak chuan Dzukou leh Kezoltsa-ah Mao mipuite sawi angin Manipur ram a awm loh thu a tarlang.

Mao mite chuan Angami mite khuakhirhna an siamsak lo thung a, mahse Angami mite chenna biala Mao mite bungraw phurh luh tum lirthei te chu Angami lam hian an dang vek a, Mao mite bungrua ni lo, midang bungraw phur lirtheite chu kaltlang an phalsak thung.

SAYO chuan an inhmuh­thiamlohna chu chinfel thuai a nih loh chuan ei leh bara Mao mite an hrekna hi chhunzawm zel an tum thu a tarlang.

Hetihlai hian Manipur lama, Committee for Khoziioy Dzükou Land Boundary Resolution Committee pawhin zanin aṭangin tiamchin awm loa Imphal leh Dimapur inkalpawhna kawngpui danchah an tum thu an puang.

Committee chuan Angami mite chu dik lo taka Manipur-a Mao mite ram luahsakah a puh bawk.

Information Centre for Hills Areas (ICHAM) president, Commi­ttee thupuangtu N Rajen­dro Singh chuan Dzükou bialah boruak a ralmuan loh thu sawiin Manipur sorkar chu ram inchuh thubuaiah hmalakna nei loah a puh a, venhimna pe turin security force dah turin a ngen bawk.