Village Administration Bill: June 10 thleng sorkar hun pe Meghalaya Governor-in ordinace bill a pawmpui

Khasi Hills Autonomous District Council (KHADC) leh Jaintia Hills Autonomous District Council te'n Khasi leh Jaintia mite khawtlang nunphunga khua/veng hruaitute thuneihna dan hnuaia pawmpuina tur, Village Administration Bill an lo pass tawh pawmpui nan kar kalta Inrinni khan Dorbar Bah Ka Bri Hynniewtrep meeting chuan state sorkar chu June 10 thleng hun a pe.

KHADC leh JHADC chuan he bill hi nikum July thla khan an pass tawh a, mahse state sorkar chuan Governor pawmpui tur atan a hnena thawn loin, a la chelh khawtlai a ni.

Bill pass thuai phutin Hynniew­trep National Liberation Council (HNLC) chuan May 27 khan bandh a lo huaihawt tawh a, zan lamah kawng­pui an dang chat mek bawk a ni.

Synjuk Rangbah Shnong (SRS) president Werlok Kharshiing chuan an hun tiam chhunga state sorkarin an thil phut a tipuitling lo a nih chuan kawng danga hmalak chhunzawm zel an tum thu a sawi.

Meghalaya High Court chuan nikum December khan Rangbah Shnong (headmen) te thuneihna chu India danpui palzutna a ni tiin a hlihsak a, KHADC leh JHADC chuan Rangbah Shnong te hi dan hnuaia pawmpuina pek tumin Village Administration Bill an pass a ni.

Hetihlai hian Meghalaya Governor V. Shanmuganathan chuan kar kalta Zirtawpni khan Meghalaya Local Administration (Empowerment of Traditional Institutions, Traditional Bodies, and Headmen in Governance and Public Delivery System) Ordinance, 2015 a pawmpui.

Ordinance a pawmpui tak avang hian Rangbah Shnong te chuan an thu­neihna huamchhungah residential certificate leh lehkha pawimawh dang­te an pechhuak leh thei dawn a ni.

Rangbah Shnong te'n certi­ficate hrang hrang an pekchhuah dan turah Ordinance chuan khuahkhirhna a siam tel bawk a, state sorkar chuan hemi chung­changah hian hriattirna a tichhuak ṭhin ang a, certificate man a bithliah theih dawn bakah ni nga chhungin certificate chu Rangbah Shnong te'n an pe chhuak ngei tur a ni, a ti.

Rangbah Shnong te'n certificate an pechhuak duh lo a nih chuan an chenna biala SDO (civil) emaw Deputy Commissioner (DC) te hnenah an zualko thei ang.

Ordinance hi thla ruk chhungin state assembly-ah putluh tur a ni. Meghalaya sorkar chuan May 11 khan ordinance hi a pawm tawh a, Governor hnena thawn a nih hnuah Governor chuan thil fel lo a awm avangin siamṭhat atan state sorkar-ah a thawn let leh a ni.