Meghalaya-in central tax-a state chanpual tipung turin ngen

Meghalaya chief minister Conrad K Sangma leh deputy chief miniser Prestone Tynsong-te chuan Nilaini khan New Delhi-ah union finance minister Nirmala Sitaraman hmuin memorandum an thehlut nghal. 

CM chuan, "Covid-19 leng avangin sum dinhmun pawh a tlahniam hle a, central tax aṭanga state dawn tur pawh 30-35% velin a tlak phah a ni, hei vang hian Finance Minister hnenah state share hi tipung turin kan ngen a ni. Thla ruk liam ta chhung khan state sorkar chaun central tax aṭanga a share tur aṭangin cheng vaibelchhe 400 vel a hloh tawh a ni," a ti. 

Union minister hnenah hian an state sum dinhmunte pawh chiang takin an hrilh tih Sangma chuan a sawi.   

CM leh Dy Chief Minister hian  Minister of State for Finance Anurag Thakur pawh hmuin, Meghalaya-a World Bank & New Development Bank project chungchangte an sawipui bawk a ni.  

Union Minister for Animal Husban­dry, Fisheries and Dairying Giriraj Singh pawh an kawm nghal a, an state economy tihmasawnna tur leh hmasawn­na ngelnghet a awm theihna atana bawng leh vawk vulh bakah sangha khawi lam tihchangtlun dan turte an sawipui. 

Sangma chuan Union Minister for Minority Affairs, Mukhtar Abbas Naqvi a kawm bawk a, Tura-a  P. A. Sangma Stadium sakna tur sum an pek avangin lawmthu a hrilh. CM chuan stadium sak hna chu ṭan thuai a ni dawn tih pawh hrilhin, Meghalaya-a Training Centre for Paramedical Staff din rawtna chungchang pawh an sawidun bawk a ni.