Dam lote enkawl duh loh vangin Hospital lakah PIL thehlut

Assam Congress hruaitu leh opposition leader, Debarata Saikia chuan state chhunga damdawi-in, dam lo in entir tumten Covid-19 medical report an neih loh avanga enkawl duh lote lakah Public Interest Litigation (PIL) a thehlut. 

Nazira bialtu MLA hian Gauhati High Court-ah PIL hi a thehlut a, hri pui leng avanga hri kai ve lo, damlo dangten harsatna an tawh mek chungchangah High Court chu inrawlh turin a ngen. 

PIL a thehluhah hian Assam-a damdawi-in tam tak chuan damlo na tak tak pawh ni se, Covid-19 an kai lo tih lanna certificate an neih loh chuan an lo en duh loin, an admit duh lo tih a sawi. Enkawlna an dawn mai loh avanga damlo ṭhenkhat thih phahte an awm a ni, a ti. 

Chief Justice Ajay Lamba leh justice Manish Choudhary awmna bench chuan Nilani khan PIL thehluh hi an ngaihtuah a, October 19-a ngaihtuah chhunzawm leh turin an dah.