Meghalaya : Faculty ti hmingchhiaah NEHU VC puh

North-Eastern Hill University Teachers' Association (NEHUTA) president Prof. Lakhon Kma chuan university-a buaina thlen chhanah vice-chancellor Prof. Prabha Shankar Shukla-a'n pawl hrang hrang - NEHU Students Union (NEHUSU), Khasi Students Union (KSU), Meghalaya sorkar leh state police-te a puh chu na takin a sawisel.

NEHUTA President hian sorkar laipuia Higher Education Secretary thuchhuak a chhan letnaah he thu hi sawiin, Prof Shukla chu midang puh kuala mawhphurna pawh la ngam lo tiin a sawi. VC Shukla thuchhuah chu NEHUTA, university stakeholder te leh Meghalaya tih hmingchhiat leh tih mualpho tumna a ni, a ti bawk.

University-a buaina a chhuah hnuah VC Shukla hian chawlh lain tun thlengin ala chawl a, December 2-a university-a a let theihna tur ngaihtuahsak tur leh, a tana a him loh avanga venhimna pe turin sorkar laipui a ngen. Hei bakah university-a buaina thleng mek chu chinfel dan ngaihtuahpui turin a ngen bawk a ni.

Kma chuan thuchhuah siamin Prof. P.S Shukla Vice-Chancellor atana an ruat chungchangah hian politics a inrawlh nasa hle a, thuk zawka zirchian phei chuan zirna leh research lamah thawh a nei lo a, publication research hrang hrangah te chhinchhiah tlak thil tih a neih loh thu a sawi bawk. Hetiang a nih lai hian NEHU faculty-te phiarruk leh sawichhiat a la chhunzawm zel a ni, a ti. Hei bakah hian faculty te thawhrimna leh research an neihte ngaihthah sakah a puh bawk a, kum thum chhung VC nihna a chelh hnu hian university hmasawnna tur a ngaihtuah loh thu a sawi.

P.S Shukla hi university-a section awm zawng zawng, academic, research, financial leh inkaihhruaina kawngah a hlawhchham fai vek a ni, tiin NEHUTA President chuan a sawi bawk. Nghakhlel taka report an ngaihchan laia VC-in December 2-a university-a let a tum chu dan chunga lengah a inngaih zia ti lang tu a ni, a ti. VC Shukla thuchhuah chu university chhunga buaina leh inṭhen hranna thlentu, mipui thinurna ti belhchhahtu leh non-tribal zirtirtute vauna a ni, a ti bawk.