Nagaland : Statehood Day vawi 62- na hmang

Nagaland chuan nimin, December 1 khan Statehood Day vawi 62-na an lawm. Kohima-a Secretariat Plaza-a lawmna an hmanah chief minister Neiphiu Rio chuan thu sawiin, remna leh muanna bakah hmasawnna chu sorkar rorelna innghahna pawimawh tak a ni, a ti.

Remna chu hmasawnna siamnan leh hmasawnna atana remna siam chu rorelna kawngah hmun pawimawh ber a ni tiin, India ram president hmasa ber S Radhakrishna, kum 1963-a Nagaland India rama state 16-na a nih ṭuma a thuchah a sawichhawng.

Chief Minister chuan Eartern Nagaland People's Organisation (ENPO) chungchanga an hma lak zel dan pawh sawiin, Settlement-III Draft Memorandum pawh Ministry of Home Affairs-ah November 6 khan theh luh a nih tawh thu a sawi bawk. November 2-a Nagaland district 17-na atana Meluri district siam chu rorelna kawnga mellung pawimawh tak a ni, tiin Pochury mipuiten hunrei tak an lo phut tawh tih hlawntlinna a nih thu a sawi. Tribal line a district siam chu sorkar thil tum a nih thu a sawi bawk.

September 12-a Kohima-a Naga political buaina chungchang ngaihtuaha consultative meeting an neihah resolution pali siam a nih chungchang pawh sawichhuakin, heng zingah hian inremna siam a nih theihna atana sorkar laipuia political-level emaw ministerial-level a palai ruat tura ngenna pawh a tel.

Rio chuan hmasawnna leh hmalakna thar tam tak a puang bawk a, chung zingah chuan Hornbill Festival hmanna tur hmun Heritage Village, Kisama tihzauh te pawh a tel. Festival hi kum 2023 khan chhimtu 154,000 an awm a, state pawn aṭangin 40,000 an awm bawk. Sector hrang hrangah hmasawnna tam tak hmuh a ni. Chief Minister Health Insurance Scheme, October 2022 a hman ṭan a nih aṭangin mi 11,899 in enkawlna dawng tawhin, hemi atana sum sen hi Rs. vbc 67.80 a tling tawh a ni. Ministry of Education pawmpuinain PM-USHA hnuaiahṭhalaite hman ṭangkai theih tur project, Rs vbc 25 hu siam a nih thu a sawi bawk a ni.