Covid-19 hospital-a inenkawl danah Tripura human rights activist-te lungawi lo

Tripura Human Rights Organization activist-te chuan an state-a COVID hospital awmchhun, Govind Ballabh Pant hospital-a inenkawl danah thil fel tawk lo a awm nia sawi chungchangah sorkar inrawlh tura phutin, Nilaini khan silent protest an huaihawt. 

Senior advocate Purushottam Roy Barman chuan Covid-19 kaite enkawl an nih dan chu state sorkarin a ngaihven thuai a ngai tih a sawi. "Inenkawlna ṭhat tawk loh vang leh, state sorkar leh health department lamin an ngaihthah avanga dam lo nunna derthawnga awm hi kan duh lo a ni. GBP hospital-a Covid-19 kaite enkawlna a ṭhat loh thu hi mipuite pawhin an hre vek a ni," a ti. 

Barman chuan Covid Care Centre-te chu tichangtlun a, thawktu pawh ruai belh tura an phut thu a sawi. Hri kai, in lama inenkawlte hnenah lawmna pawisa fai pe tura an phut thu a sawi  bawk. Thla ruk liam ta chhung khan state sorkar chuan thil chi hrang hrang a tiam a, mahse damlote enkawl dan chungchanga thutiamte chu engmah tihpuitlin a nei lo a ni, tiin a sawi. 

Tripura state-a hripui leng a hluar zel avanga state sorkarin sorkar laipui puihna a dil hnuah, union ministry of health and family welfare chuan health department pui turin expert doctor pahnih a tir. 

Doctor pahnihte hian hri leng dona leh a darh tur venna kawnga state health department hmalakna te ennawnin, an pui dawn a ni. Sorkar laipuiin a tirh expert pahnihte hi Dr Daisy Panna, Consultant Epidemiologist, National Centre for Disease Control (NCDC) leh Dr PK Verma, Assistant Prof respiratory medicine, Lady Hardinge Memorial College (LHMC) te an ni. 

Nimin khan Tripura an thleng a, ni 10 chhung an awm dawn a ni.