Sorkar ads-ah minister thenkhat thlalak tarlang

Justice Ranjan Gogoi kaih­hruai, Supreme Court bench chuan tunhnai khan chanchinbu leh hmun danga fakna tarchhuah chi sorkarin a siamah political party hruaitu leh minister te thlalak tar a khap a, hetihlai hian Assam, Majuli-a North East Youth Festival neih turah SC thuchhuak hi palzut niin, festival neih tur puala adver­tisement buatsaihah minister leh political party hruaitu ṭhenkhat thlalak tarlan a ni.

Minister leh political party hruaitu thlalak tarlan te hi Assam mi, tuna Union Sport Minister Sarbananda Sonowal, Assam-a Congress minister Rajivluchan Pegu leh Meghalaya Tura bial MP, NPP president PA Sangma te an ni.

Social activist GK Hazarika chuan North East Youth Festival chu sorkar bultuma neih tur a nih avangin minister leh party hruaitute thlalak tarlan chu fuh a tih loh thu sawiin, dan palzutna a ni, a ti.

Hetihlai hian BJP hruaitu pakhat chu minister leh party hruaitute thlalak chu Majuli-a festival neih chhunga tar tur, banner-ah chauh tarlan a ni, a ti.

Supreme Court chuan sorkar advertisement-ah hian Prime Minister, President leh Chief Justice of India te thlalak chauh tarlan a phal tawh a, hemi atan pawh hian anmahni phalna lak hmasak tur a ni tiin thuchhuah a lo siam tawh a ni.

Assam Chief Minister Tarun Gogoi chuan Prime Minister te chu India rama thuneitu ber a nih angin sorkar advertisement-ah a thlalak tarlan phu a tih thu a sawi a, hemi rual hian state chief minister te pawh state pakhat thuneitu ber an nih angin state sorkar advertisement-a an thlalak tarlan phu a tih thu a sawi.