Village Administration Bill: HYC member man te judicial custody-ah dah

Hynniewtrep Youth Council (HYC) member pasarih chu kar kalta Zirtawpnia Shillong-a rally an huaihawt ṭumin man an ni a, heng zinga pathum chu local court-in ni 12 chhung judicial custody-ah a dah.

East Khasi Hills SP, M Kharkrang chuan hemi chungchang hi sawiin, Code Of Criminal Procedure (CrPC) section 144 tlawhchhana sorkarin mipui punkhawm a phal loh chu palzut turin HYC member pasarihte hian mipui an fuih a ni, a ti.

Khasi leh Jaintia khawtlang inrelbawlnaa veng/khua hruaitute (Rangbah Shnong) dan hnuaia thuneihna siamsakna tur, Village Administration Bill Meghalaya sorkarin a tihkhawtlai chu Governor pawmpuina pek thuai phutin rally a huaihawt a ni.

Hetihlai hian Village Administration Bill pawmpui phuta May 16 aṭanga chaw ngheia nawrh huaihawt tawh, Khasi Hills Autonomous District Council (KHADC) CEM hlui Adelbert Nongrum chu kar kalta Inrinni khan a taksa chak lo avangin damdawi ina dahluh a ni.

Rangbah Shnong te dan hnuaia thuneihna siamsak tur chungchangah Meghalaya sorkar chuan kar kalta Zirtawpni khan Meghalaya Local Administration (Empowerment of Traditional Institutions, Traditional Bodies, and Headmen in Governance and Public Delivery System) Ordinance, 2015 a siam a, ordinance hi Governor V. Shanmuganathan pawhin a pawmpui nghal.

State sorkarin ordinance a siam hi Khasi Students' Union (KSU) chuan ṭhiat tura sorkar an phut thu Pathianni khan an tarlang.

KSU president Daniel Khyriem chuan state sorkarin ordinance a siam chu KHADC-in Village Administration Bill a lo pass tawh nen a inkalh a ni, tiin a rang thei ang bera ṭhiat turin sorkar a phut thu a sawi.

Khasi leh Jaintia te khawtlang inrelbawlnaa Rangbah Shnong te thuneihna pawmpuina tur chungchangah KSU chuan KHADC-in bill a lo pass tawh a, Section 5 hnuaia sub section 2 leh sub section 16 te chu ordinance-ah hian telh an duh thu a tarlang a, heng section te hi telh a nih chuan ordinance chu an dodal loh thu a sawi.

KSU chuan Village Administration Bill sawihona nei turin nimin khan pawl hrang hrang 13 telna tur meeting a ko nghal.

KHADC pawhin kar kalta Inrinni khan Village Administration Bill a lo pass tawh a, section ṭhenkhat chu India danpui leh Representation of People’s Act 1950 a kalh a ni, tiin a amend leh bawk a ni.