Bangladesh aṭangin Anup Chetia hruaikir tum

Sorkar laipui chuan United Liberation Front of Assam (ULFA) helpawl general secretary Anup Chetia chu Bangladesh aṭangin India-ah hruaikir a tum.

External Affairs Minister Sushma Swaraj chuan he thu hi sawiin Prime Minister Narendra Modi-a'n Bangladesh a tlawh hunah Chetia hruaikir dan tur chungchang hi Bangladesh thuneitute sawipui a tum thu a sawi.

Chetia hi kum 1991 khan Assam-ah man a ni a, mahse hemi hun laia Assam Chief Minister Hiteswar Saikia chuan a chhuah zalen leh a ni. December 21, 1997 khan Bangladesh khawpui, Dhaka-ah man a ni a, Dhaka, Kashimpur Jail-ah tantir mek a ni.

Modi hian June 6 hian ni hnih cham turin Bangladesh a pan ang a, India leh Bangladesh-in ram inchuh thubuai chinfelna atana Land Boundary Agreement (LBA) an lo ziah tawha chinfel ngaite a tihfel nghal beisei a ni.