M'laya-in kawngpui atan fund dil belh
World Bank suma Meghalaya-in Pradhan Mantri Gram Sadak Yojana Rural Roads Project (PMGSY) thawh hnihna a kalpui chu sum a awm loh avangin hma lak theih a ni tawh lo a, hemi atan hian state sorkar chuan sorkar laipuiah fund a dil belh.
PMGSY project hi tun financial year chhunga peihfel hman tura ruahman a ni a, mahse sum awm loh avangin chhunzawm theih a ni lo.
Meghalaya PWD Minister S Dhar chuan Union Minister for Rural Development Chaudhary Birendra Singh hnenah tun hnai khan project zawh fel nan vaibelchhe 250 an dil belh thu leh, Union Minister chuan an ngenna chu lo bawhzuisak a tiam tih a sawi.
"PMGSY project thawh hnihnaah Meghalaya chuan thingtlang bialah kawngpui kilometre 1625-a thui sial a tum a, mahse fund awm loh avangin hna thawh chhunzawm theih a ni lo," tiin Dhar chuan a sawi.
PMGSY project thawh hnihnaah hian kawngpui kilometre 1112.83-a thui leh lei 36 dawh tura ruahman a ni a, kum 2012 khan hna thawh ṭan a ni. Kum 2015-16 atan Union Rural Development Ministry chuan cheng vaibelchhe 92 a ruahman a, hemi aṭang hian vaibelchhe 40 chu pekchhuah tawh a ni a, sum lakchhuah loh vaibelchhe 52 a la awm.
Dhar chuan PMGSY project hnuaiah World Bank-in kum nga chhunga thingtlang kawng sial nan cheng vaibelchhe 1070 a tum thu a sawi a, ram chhengchhe tak taka hnathawh a nih vang leh thil man sang chho zel avangin project chu chak zawka kalpui theih a nih loh thu a sawi bawk.