Hmarchhak bial venhimna enpui reng a ni : Rajnath Singh

Nagaland, Arunachal Pradesh leh Meghalaya-ah helte'n security force te an bei ṭhin tih chu a hriatpui thu sawiin Union Home Minister Rajnath Singh chuan hmarchhak bial venhimna chu a ministry-in ngun taka a enpui reng thu a sawi.

"Hmarchhak biala venhimna kalpui dan chu sorkar laipuiin level hrang hrangah a enpui reng a ni," tiin Singh chuan tunhnai khan press conference-ah a sawi.

Helte beilet turin sorkar laipui chuan agency hrang hrangte ṭanrualpuiin, theihtawp a chhuah tih Union Home Minister chuan a sawi a, ramri kana che ṭhin helte veng turin Effective Border Management kalphung thar pawh duan a ni, a ti.

Nagaland-a helpawl, NSCN (K) helte chuan sorkar laipui nena inkahhai thuthlung an ziah chhunzawm duh loh hnuah Assam Rifles te an bitum nasa hle a, thla thum chhungin NSCN (K) helte kutah sorkar sipai pakua an thih tawh bakah mi eng emaw zatin hliam an tuar tawh a ni.

Sorkar sipaite laka pawikhawihna thleng thar berah Pathianni khan Meghalaya-a North Garo Hills district-ah helte'n Central Reserve Police Force (CRPF) te chu vawmpuah bomb hmangin an bei a, CRPF commando pali-in hliam an tuar leh a ni.