Manipur naupangte'n AFSPA hlip turin PM an ngen

Sipaite hnena thuneihna sang pekna dan, Armed Forces (Special Powers) Act (AFSPA) lekkawh mek chu hlih phutin, Manipur-a school naupang 3,000 chuangin Prime Minister Narendra Modi hnenah postcard an thawn.

"Intluktlanna leh muanna chu khawvelah a awm a ni tih Manipur mipuite pawhin an hriat theih nan hma min laksak turin kan ngen che a, hemi atana i inpekna lantir nan leh democracy humhalh nan AFSPA min hlihsak kan phut a ni," tiin school naupangte chuan postcard an thawnah an ziak.

Human rights activist Babloo Loitongbam chuan, AFSPA chu buai zawng zawng chinfelna a ni lo tih kan hria a, mahse naupangte chuan AFSPA awm lohna Manipur siam an duh thu Prime Minister hnenah an thlen mai a ni, a ti.

Tunhnaia Tripura sorkarin a state chhunga AFSPA hlih a remtih hnuah Manipur-a AFSPA hlih phutna thawm hi a ring zual a, activist Loitongbam chuan Manipur sorkar chu hemi chungchanga hma la duh loha a puh bakah AFSPA chu sorkar laipui aṭanga fund hmuhna remchanga hmangah a puh bawk.

Manipur-a AFSPA hlih phutin activist Irom Sharmila chuan kum 2000, November aṭangin chaw ngheiin nawrh a huaihawt tawh a ni.