Meghalaya: NEHU-ah vawiin aṭangin zirna chhunzawm dawn

North-Eastern Hill University (NEHU) buaina avanga thla khat dawn zirna kalpui thei loa an awm hnuah, vawiin Nilaini aṭang hian zirna chhunzawm a ni leh dawn ta. He thutlukna hi vice chancellor Prabha Shankar Shukla-a'n ni 15 chhung chawlh a lak belh leh hnua siam a ni.

VC chawlh lakbelh hi Ministry of Education pawmpuina niin, ni 15 chhung member pahnih awmna committee-in university chhunga buaina leh inkaihhruaina felhlel awm an chhui mek an pawhsei leh vang a ni. VC awm zel dan tur chu committee-in a thil hmuhchhuah aṭang hian Ministry hian a ngaihtuah ang.

Zirna chhunzawm a nih tur thu hi NEHU Students Union (NEHUSU) leh NEHU unit, KSU ten meeting an neih hnuah an puang a, NEHUSU general secretary Toniho S Kharsati chuan VC nih tlin loh vanga class tih tawp reng chuan zirlaite hma hun ati khawlo thei a ni, a ti.

Academic Council pawh vawiin hian inhmukhawmin academic calender ennawnna an nei bawk ang. Kharsati chuan Prof. Shukla chu a nihna aṭanga bantir tumna chu kalpui a la nih reng tur a sawi a, sit-in demonstration pawh tlai dar 3 aṭanga dar 5 thleng an la neih chhunzawm tur thu a sawi bawk.

NEHU Teacher's Association (NEHUTA) president Lakhon Kma chuan zirna chhunzawm a nih dawn vanga a lawm thu sawiin, zirna hun an hloh tawh zawng zawng ngaiawh tir leh turin hmalak a ngaih thu a tarlang. Inquiry committee report pawh stakeholder zawng zawng pawm tlan theih a nih ngei a beisei thu a sawi bawk a, Prof. Shukla ban a nih tur leh tur loh chu an report nghahhlelh ber a ni, tiin a sawi.