Tripura: Bangladesh High Commission beih vangin police 3 suspend

Tripura Police chuan state khawpui, Agartala-a Bangladesh Assistant High Commission-a right wing activist ṭhenkhat luta buaina an siam leh, Bangladesh flag an tih chhiatsak chungchangah an hnaa inthlahdaha puhin sub-Inspector pathum a supsend a, Deputy Superintendent of Police (DySP) chu Police Headquarters-ah a sawn bawk.

Thawhṭanni zan khan Bangladesh Assistant High Commission, Agartala bulah hian Bangladesh-a Hindu miten tih duhdah an tawrh duh lohna leh, ISKCON member Chinmoy Krishna Das Prabhu chhuah zalen phutin sit-in protest huaihawt a ni. Lungawi lohna hi right-wing organization, 'Hindu Sangharsh Samity' bul tuma huaihawt a ni.

Venhimna khauh taka kalpui ni mah se mi ṭhenkhat chu Bangladesh Assistant High Commission-ah memorandum thehluh tumin an lut a,security paltlangin office chhungah lutin Bangladesh national flag an tihchhiat sak bawk.

West Tripura District Superintendent of Police (SP) Kiran Kumar chuan Bangladesh Assistant High Commission in beih an tawh thu leh pawikhawihtute man an nih tawh thu a sawi a, police official ten an mawhphurna an hlen loh vangin disciplinary action pek an nih thu a tarlang. Sub-Inpector pathum suspend niin DySP pawh Police Headquarter ah an sawn thu a sawi a, Suo moto case ziahluh niin mi pasarih an man bakah chhuizuina neih mek anih thu SP Kiran Kumar chuan a sawi bawk.