Manipur: Sipai 2,000 chuangin mi bo zawn beihpui thlak

Manipur-a kar khat chuang chin hriat loha bo tawh, Meitei mi Laishram Kamalbabu Singh zawn beihpui thlak turin Indian Army chuan sipai 2,000 chuang Manipur-ah a tir lut.

Laishram Kamalbabu Singh hi, Assam Cachar district mi niin contractor hna thawk viltu a ni. Military Engineering Services (MES) nena thawkdun Khukrul, Imphal West-ah a khawsa a ni. Mahse kar khat liam ta aṭang khan chin hriat lohin a awm a ni.

Chief minister N Biren Singh chuan military station aṭanga a bo thu a sawi a, thuneitu lam chu a zawn hmuh kawnga mawhphurna la turin a hrilh a ni. Manipur Police chuan Indian Army te puihnain November 25 aṭang khan Laishram Kamalbabu Singh zawn hna hi an thawh thu an tarlang. Indian Army hian theihtawp a an puih bakah, helicopter, drone leh ui fing te pawh hman a ni tih an sawi bawk.

December 2-a press conference an neihnaah CM chuan an dinhmun chu a lungchhiatthlak thu a sawi a, mipuite pawh Singh awmna chin hre tur hian hma la ṭheuh turin a chah. Sipai leh police-ten helicopter leh ground team hmangin nasa taka an zawn mek thu leh, tun thlengin a awmna chin hi an la hriat theih loh thu a sawi bawk a ni.

Military camp hi Kangpokpi district a awm a ni a, state khawpui Imphal aṭanga km 16 vela hlaa awm niin Kuki te chen tamna, tlangramin a hual bawk a ni.