Arunachal Pradesh : CM in zirna ṭha zawka thlak danglam tiam

Arunachal Pradesh chief minister Pema Khandu chuan kum thum chhungin an state education sector-ah hmasawnna leh inthlak danglamna lian tham thlen a tiam. Zirna changkang, infrastructure ṭha leh state chhunga ṭhalaite tan hamṭhatna hrang hrang pek an ni dawn tih a sawi.

West Siang district-a Aalo bul Logum Jini-a public meeting-a thu a sawinaah Chief Minister chuan education minister PD Sona leh a advisor Mutchu Mithi kaihhruainain, state chhung hmun hrang hrangah department document pawimawh leh buaina awm zirchianna an neih mek thu leh rel fel dan kawng an zawn thu a sawi bawk. Report kimchang leh rawtna awm ang ang te chu state sorkar hnenah thehluh a ni dawn a, rawtna siam zawng zawng chu 100% tih hlawhtlin a intiam thu CM Khandu chuan a sawi bawk.

Zirna in tam ringawt ni loa zirna ṭha zawk inpek a ṭangkai thu Khandu chuan a sawi. Sorkarin inter-village school te chu facility hrang hrang - hostel, zirtirtu leh staff te bakah tunlai khawvel changkanna hmanga thuam ṭhat a tum tih a sawi. Hmasawnna kawnga rawtna awmte chu tih lawhtlin vek a har dawn avangin mipuite thlawpna leh thawh hona neih ṭhat a pawimawh thu CM Khandu chuan sawi.

CM chuan state sum hmuh a pun chhoh dante sawiin, hydropower chu an sum lak luhna pawimawh tak a ni tih a sawi. India rama hydropower awm zat zinga 50% hi Arunachal Pradesh in a nei a ni. Sorkar laipui chuan state chhungte project thawhnaah pakhatah equity share 26% pek zel a remti bawk.