Poverty alleviation leh organic farming-ah Sikkim hlawhtling

State a nih aṭanga kum 40-na hmang mek, Sikkim chuan kawng hrang hrangah hlawhtlinnaa nei chho mek zel a, ziak leh chhiar, retheihna umbo, sanitation leh organic farming-a a hlawhtlinna chu India ram mai ni lo Asia khawmuala lang tham a ni.

Sikkim hi India rama mihring tlemna ber state niin, kum 1975 khan Indian Union a zawm a, mihring 6,10,000 vel an awm.

Kum 2004-05 aṭang khan a gross domestic product (GDP) per capita chu double digit-in a ṭhang a, poverty ratio kum 2004-05-a nuai 1.7 (30.9%) aṭangin kum 2011-12-ah 51,000 (8.2%)-ah a tlahniam a, a tlakna hi 22% a ni. Kum 1994 khan poverty ratio hi 40% a ni.

Retheihna umbo kawngah India rama tiṭha ber state panga zingah a tel pha a, a hmaah Goa (5.1%), Kerala (7.1%) leh Himachal Pradesh (8.1%) te an awm.

Ziak leh chhiar thiam tam lam hi kum 2001-a 68.8% aṭangin tunah 82.2%-ah a chho tawh a, 100% literate state-a siam tumin hma a la mek a ni.

Kum 2003 aṭangin ogranic farming-ah beihpui a thlak ṭan a, tunah hian organic state-a puan tawh niin, kumin kumtir khan Prime Minister Narendra Modi pawhin organic farming-a an hlawhtlinna chu fakawm a tih thu Germany-ah a lo sawi tawh bawk. Sikkim-a thlai chinna ram hectare 60,000-a zau aṭangin 40% chu organic a ni.

Kum 2014 khan United Nations chuan Human Development lama a thawhṭhat avangin Sikkim chu a fak tawh bawk a, India-a United Nations Development Programme (UNDP) hotu hlui, Lise Grande chuan human development-a Sikkim hlawhtlinna chu ropui a tih thu a sawi.

Sikkim hi kum 2008, December khan India rama 100% sanitation coverage awmchhunah puan a ni bawk a, inthiarna nei lo an awm lo.