Media zalenna khuahkhirh kan tum lo: M'laya DGP

Meghalaya Director General of Police (DGP) Rajiv Mehta chuan Hyn­niewtrep National Liberation Council (HNLC) te bandh huaihawt chungchang media-a tarlan danah khuahkhirhna siam tura Meghalaya High Court a ngenna chu media zalenna khuahkhirh tumna a ni lo, a ti.

Meghalaya HC chuan tun hnai khan DGP ngenna angin pawl ṭhenkhatin mipui nunphung tikhaihlak thei, bandh, strike, kawng zawh leh kawngpui dangchah an huaihawt ṭhin chungchang chu media-a thehdarh lo turin media mite a hriattir a ni.

Mehta chuan HC-a ngenna a thlen chungchang hi media mite sawipuiin, dan pawna hnawl tawh HNLC te chanchin report danah media te chu fimkhur se ka duh avangin HC-ah ngenna ka siam mai a ni, a ti.

HNLC te bandh huaihawt ṭhin chuan mipuite a tithlabar a, an rilru-ah hlauhna a siamsak a ni, tiin Mehta chuan a sawi.

"HNLC helte hian Bangladesh-ah member 30-40 vel chauh an nei tawh a, mahse mipuite chuan bandh an huaihawtin an la hlau reng tho a ni. Mipuite chuan bandh chu thlawp loin, zawm lo se ka duh a ni," a ti.

Meghalaya DGP chuan Garo Hills-a Garo National Liberation Army (GNLA) helte pawh sawiselin, GNLA helte chuan Garo mite chungah tharum an thawh ṭhin a, mahse mipuite dinhmun chawi kanna atana hma laah an inchhal tho a ni, a ti.