Nongrum-a'n chaw ngeia nawrh a titawp

Village Administration Bill-ah Go­ver­nor pawmpuina phuta ni 17 chhung chaw ngheia nuar tawh, Khasi Hills Autonomous District Council (KHADC) CEM hlui, Adelbert Nong­rum chuan Thawhṭanni khan nawrh a titawp.

Nongrum hian Shillong Civil Hospital bulah May 16 aṭang khan chaw nghei a ṭan.

KHADC chuan kar kalta Inrinni khan special session neiin, Village Administration Bill chu amend-in, a pass nawn leh a, hei vang hian Nongrum chuan chaw ngheia nawrh a huaihawt chu a titawp lailawk a ni. Nongrum hian CEM a nih laia bill an lo pass tawh ngei chu state sorkarin a pawmpui a duh thu a sawi.

KHADC CEM hlui hian Thawhṭanni khan Governor V Shanmuganathan a hmu nghal a, Khasi hnam humhalh nan KHADC special session-in amendment a siam a, clause ṭhenkhat a paihte chu telh leh turin a ngen a, CEM a nih laia bill an lo pass tawh chu pawmpui a duh thu a thlen.

Village Administration Bill hi Khasi leh Jaintia mite khawtlang inrelbawlnaa veng/khua hruaitu (Rangbah Shnong) te thuneihna chu dan hmanga pawmpuina tur a ni a, Meghalaya sorkar chuan kar kalta Zirtawpni khan Meghalaya Local Administration (Empowerment of Traditional Institutions, Traditional Bodies, and Headmen in Governance and Public Delivery System) Ordinance, 2015 a siam a, Governor-in a pawmpui nghal.

Hetihlai hian Khasi Students' Union (KSU) chuan state sorkarin ordi­nance a siam chu ṭhiah an phut thu an tarlang a, Village Administration Bill chungchangah pawl hrang hrang 13 telna meeting an huaihawt bawk.