Zeliang-a'n Nagaland dinhmun PM hnenah a thlen

Nagaland Chief Minister T.R Ze­liang chuan Thawhṭanni khan Prime Mi­nis­ter Narendra Modi chu New Delhi-ah a hmu a, Nagaland harsatna leh venhimna lama an dinhmunte a thlen.

CMO media cell thuchhuak chuan he thu hi tarlangin Zeliang chuan SS Khaplang-a kaihhruai, Nationalist Socialist Council of Nagaland (NSCN-K) helte'n tun hnaia inkahhai thuthlung an ziah chhunzawm duh loh chungchang te pawh Prime Minister hnenah hian a thlen a, NSCN (K) leh sorkar laipuiin inkahhai thuthlung an tihtawp chungchangah state sorkar thurawn lak a nih loh thu a tarlang.

NSCN (K) leh sorkar laipuiin inkah­hai thuthlung a titawp chu Nagaland ralmuan loh chhan leh dan leh thupek dinhmun tlakchhiat chhan tiin Zeliang chuan Prime Minister Modi a hrilh a, helte laka chetlakna avanga Myanmar ramria venhimna khauh lutuk chuan nitina mipuite eizawnna kawngah harsatna a thlen thu a tarlang tel bawk.

Nagaland sorkar leh mipuite chuan NSCN (K) leh sorkar laipui hian inkahhai thuthlung chhunzawm leh se an duh a ni, tiin Zeliang chuan a sawi.

Chief Minister Zeliang hi state Home Minister Y. Patton leh advisor to CM Lalthara te'n an ṭawiawm a, Prime Minister an hmuh hnuah Union Home Minister Rajnath Singh pawh an hmu nghal.

Union Home Minister Singh leh Zeliang-a'n meeting an neihah hian Union Home secretary, L.C. Goyal leh MHA joint secretary (NE) Shambhu Singh pawh an tel a, Naga peace talk kalpui zel dan tur an rel. Naga peace talk atan hian MHA official leh state sorkar official te chuan meeting neih thuai an tum.

Naga peace talk-a sorkar laipui aiawhtu, Interlocutor R.N. Ravi chuan Zeliang hi Nagaland House-ah a kawm bawk a, peace talk an kalpui dan leh hma a lo lak tawh dante a hrilh.

Chief Minister Zeliang chuan peace talk chu a rang lama chinfel a nih theih nan theihtawp chhuah turin Ravi a ngen nghal.