Assam-a Garo te'n autonomous an nei dawn

Assam Chief Minister Tarun Gogoi-a'n a lo tiam tawh angin Assam-a Garo hnamte chuan anmahni hnam puala inrelbawlna, autonomous council an nei dawn.

Garo National Union (GNU) palai 12 te chuan Thawhṭanni khan hemi chungchangah hian Chief Minister Gogoi chu a office-ah an hmu a, Garo Autonomous Council din tura ngenna, memorandum an thehlut.

GNU advisor M.S. Sangma chuan Chief Minister chu an thil phut bawhzuisak turin a ngen tih a sawi a, Gogoi chuan Assam-a hnam hrang hrangte hamṭhatna chu a ngaihpawimawh thu leh GNU te thil phut pawh a lo bawhzui tur thu a lo hrilh.

Chief Minister Gogoi chuan Garo Autonomous Council dinna atana thil ṭulte chu state sorkarin a buaipui mek tih a sawi bawk a, state assembly session neih leh hunah sawi ho atana chhawpchhuah a tum thu a sawi.