NE-a health care tichangtlun nan hma lak tum a ni: DoNER Minister

Development of North-Eastern Region (DoNER) Minister Jitendra Singh chuan sorkar laipuiin hmar­chhak biala dam­dawia inenkawlna lam tih­changtlun nan a ministry-in kawng dap a tum thu a sawi.

"Health leh medical care atan hmalakna thar hi public enterprise emaw public–private part­nership (PPP) kal­phunga kalpui a ni ang," tiin Union Minister Singh chuan medical team mee­ting a neihpuiah a sawi.

Meeting-ah hian Apollo Hospitals Joint Managing Director Sangita Reddy pawh a tel a, DoNER Minister hnenah hian PPP kalphung hmanga health care kalpui tura an ngenna an thlen nghal.

Singh chuan hmar­chhak state te'n a hnenah health care tichangtlung tura ngenna an thlen tawh thu sawiin, mahse thutlukna an siam loh thu a sawi a, sorkar sumbawm aṭanga sum hman tur nge PPP kalphunga kalpui tur tih erawh zirchian ngai a la ni, a ti.

DoNER Minister Singh chuan hmarchhak bialah medical college ṭha­­hnem tak awm mah se damdawia inen­kawlna lamah in­daihlohna a la nasa hle a ti a, mipuiin hriselna lam an ngaihpawimawh zel avangin tuna thil mamawh chu health service hrang hrang pek tam ringawt ni loin damlo te'n state dang, hmun hla tak tak an pan a ṭul loh nan health service rintlak tak siam a ni, a ti.

Medical professional, Union Minister Singh chuan hmarchhak biala health care tihchangtlun nan health care agency te hnen aṭangin thurawn a dawn theih reng thu a sawi bawk.