Act East Policy-ah Modi sorkar a hnungtawlh: Gogoi

Assam Chief Minister Tarun Gogoi chuan Prime Minister Narendra Modi kaihhruai NDA sorkar chu ‘Act East Policy’ chungchangah a hnungtawlh zawnga kalah a puh.

Gogoi chuan sorkar laipuiin hmar­chhak state te special category status a hlihsak chu sawiselin, Act East Policy-ah pawh sorkar laipui thiltumte chu a puitlin a rin loh thu a sawi.

Assam Chief Minister chuan Modi sorkar chuan eng tin nge Lok Sabha inthlan neih ṭuma a thutiam- hna thawh tur siamte, investment tam zawk hiphluh te leh hmarchhak biala industry dinte chu a tihpuitlin theih ang? tiin zawhna a siam bawk.

Hetihlai hian Gogoi chuan Prime Minister Modi chu Bangladesh a tlawh hunah Bangladesh mi pemte thawnkir dan chungchang Bangladesh thuneitute sawipui turin a ngen.

Gogoi chuan court leh tribunal-in Bangladesh mi sang chuang an hmuchhuak tawh a, mahse Bangladesh sorkar chuan heng mite hi a khua leh tuiah pawm duh loin an ramah a lakir duh lo a ni, a ti.

Phalna nei loa India rama pemte thawnkir dan chungchang chu Modi sorkar chuan Bangladesh PM Sheikh Hasina sorkar a sawipui a ngai a, kawng an dap a ṭul a ni, a ti. Bangladesh mite thawnkirna chu Assam-a pemlutte chungchang chinfelna tur a ni, tiin Gogoi chuan a sawi bawk.