Manipur cabinet-in N'land ramri enfiah tir a tum
Manipur leh Nagaland ramri, Dzuko Valley-a ram inchuh thubuai chinfel nan Manipur cabinet chuan ramri chu Survey General of India enfiah tir a tum.
Hemi rual hian state sorkar aiawhin, Dikho Mao bialtu MLA, RD&PR Minister Francis Ngajokpa leh Works & Transport Minister Kh Ratankumar te chuan ram inchuh thubuai chungchang a hmuna zirchiang turin nimin khan Senapati district-a Mao khua an tlawh a, Senapati DC leh SP te meeting an neih hnuah Dzuko Valley pawh tlawh an tum bawk.
State sorkar thupuangtu, M Okendro chuan Dzuko Valley-a Manipur ram Nagaland mite'n an luahsak chu state sorkarin a ngai thutak hle tih a sawi a, Chief Minister Ibobi Singh pawhin inrawlh turin Prime Minister leh Nagaland Chief Minister a ngen tawh bawk a ni, a ti.
Okendro chuan ram inchuh thubuai chinfel nan state cabinet-in Survey General of India chu ramri ennawn tura ngen a remtih thu a sawi a, Committee for Khoziiri-Dzuko Land Boundary Resolution-in Manipur lama, Imphal-Dimapur inkalpawhna kawngpui an dahchah pawh titawp tura an ngen thu a sawi bawk.
Manipur lama ram inchuh thubuai kaihhnawiha ṭangrual pawl, Committee for Khoziiri-Dzuko Land Boundary Resolution chuan June 1 zan aṭanga khan tiam chin awm loin Imphal-Dimapur kawngpui danchah an ṭan a, hetihlai hian Nagaland lamah Southern Angami Youth Organization (SAYO) te pawhin, June 1 aṭang khan Manipur lama Mao hnamte chu ei leh bara hrek tumin kawngpui an danchahsak bawk.