Manipur : Inter-district transport service chhunzawm tir

Manipur sorkar chuan nimin, December 4, 2024 aṭang khan venhimna khauh tak hnuaiah inter-district public transport service te Imphal leh tlangram district inkarah tlan tir leh ṭan an ni tih a sawi.

Imphal phairuama cheng Meitei mipuite leh tlangrama cheng, Kuki inkara buaina chhuah hnuah inter-district tranport service hi ti tawpin, sorkar chuan tun ṭum hi thla 19 chhunga service chhunzawm tir a tum vawi hnihna a ni. Nikum December khan public bus hi Imphal aṭanga Senapati leh Kangpokpi bakah Churachandpur leh Bishnupur ah te state sorkar chuan tlan tir a lo tum tawh bawk. Imphal aṭanga Kangpokpi pana lirthei tlan chu kawnglaka lungawi lohna lantirtu ten ti buaiin an let leh a ngaih phah a, hei vang hian tlan tir chhunzawm an ni ta lo a ni.

State sorkar chuan dan leh thupek dinhmun thlira security force hnathawh dan te,

agency hrang hranga aṭanga report an dawnte a ennawn hnuah, venhimna khauh tak hnuaiah bus-te hi a tlan chhunzawm tir leh ta tih chief secretary Vineet Joshi thuchhuah chuan a tarlang.

Bus hi state khawpui Imphal aṭangin Kangpoki kaltlangin Senapati, leh Imphal aṭangin Bishnupur kaltlangin Churachanpur-ahte te nimin aṭang khan tlan chhunzawm tir leh an ni ta a ni. Heng lirtheite hi darkar bithliah chauha tlan tur an ni a, lirthei tlan lai tih buai a nih chuan dan hmanga hrem an nih tur thu thupek an chhuah nghal.

Senapati hi Naga hnam awm tamna hmun a ni a, Kangpokpi leh Churachandpur hi Kuki-Zo awm tamna hmun a ni thung. Imphal leh Bishnupur-ah hian Meitei hnam inbengbel bawk a ni.