Assam: Chief Minister-in union minister-te hmu

Assam chief minister Himanta Biswa Sarma chuan December 3, 2024 khan state chhunga hmasawnna tur project an thawh hrang hrang chungchang sawipuiin union minister-te a hmu a, an zingah hian Nitin Gadkari leh JP Nadda te pawh an tel.

Union Minister of Road Transport and Highways, Nitin Gadkari nena meeting an neihah, CM Sarma chuan an state-a national highway siamna kalpui mek leh, Guwahati ring road project chungchang a sawipui. Sarma hian Gadkar nena meeting hlawhtling tak an neih thu hi a official X-ah a tarlang a, MORTHIndia aṭanga Assam-a infrastructure project thawhna kawngah thlawpna an dawn thu leh a hun taka zawh a nih theih nana ngaihpawimawh bera an dah avangin a lawm thu a sawi.

CM chuan Assam flagship infrastructure project pathum, Guwahati ring road, Kaziranga kawngpui tihsanna tur Gohpur leh Numaligarh inkara tui hnuaia leiverh siam chungchangte Gadkar hi a sawipui a ni. Jorhat-Dibrugarh national highway siam mek leh, Baihata Chariali aṭanga Mission Chariali pawhna tur highway zauh hna thawk mek pawh an sawi dun bawk.

Union health minister Nadda nen meeting an neihnaah, CM Sarma chuan nakkum February thlaa Advantage Assam Business Summit neih tura tel turin a sawm. State chhunga PMJAY, Ayushman Arogya Mandir leh central health-related scheme hnuaia an hnathawh hrang hrang an kalpui mekte chu Nadda hnenah hian a sawifiah bawk a ni.

Sarma hian commerce and industry minister Piysh Goyal pawh hmuin, Advantage Assam Business Summit chungchang an sawidun ve leh bawk. Anni bakah hian telecommunication and DoNER minister Jyotiraditya Scinda pawh a hmu bawk.