Sikkim: Health Minister in Sajong Pharmacy College sawisel

Sikkim health minister G.T Dhungel chuan Sajong Pharmacy College, Rumtek-a awm chu tlawhin, an inkaihhruai dan chuan a duhthu a sam loh thu a sawi.

Sajong Pharmacy College hi kum 2018-a din a ni a, Sikkim University hnuaia awm a ni. Minister hian institution a tlawh ṭum hian college tlakchham hrang hrang a sawilang a, an inkaihhruai danah pawm theih loh tam tak a awm thu a sawi bawk a ni. He college hi All India Council of Technical Education (AICTE) leh Pharmacy Council of India te pawmpuina hnuaia mi a ni a, zirna inpek dan chungchangah leh infrastructure standard-ah sawiselna an tawk fo tawh.

Minister Dhungel chuan college thuneitute chu meeting neihpui nghalin, an buaina leh harsatna neihte an sawi ho. Zirlaite hamṭhatna tur buaipui chu an tih hmasak ber leh an ngaihpawimawh ber a nih tur thu a hrilh a, zirna ṭha leh changkang zawk zirlaite pek chu an mawhphurhna anih thu a sawi bawk. College thuneitu lam pawhin thil fel tawk lo awmte chu siamṭhat an tiam. Dhungel chuan hmasawnna tur pawimawh tam tak siam chu kenkawh a nih leh nih loh enthlak reng an nih tur thu a sawi nghal bawk.

Minister hi health department official-ten an ṭawiawm a, CM Prem Singh Tamang-Golay kaihhruaina hnuaiha state sorkarin Sikkim-in hma a sawnna tura theihtawp a chhuah dante a sawilang bawk a ni.