Assam: Sorkarin hotel leh puipunna hmuna bawngsa ei khap

Assam sorkar chuan restaurant, hotel leh puipunna hmuna bawngsa ei khapna thupek a ti chhuak. He thupek hi chief minister Himanta Biswa Sarma chuan Nilaini khan a puang.

Bawngsa ei khapna thupek hi Assam Cattle Preservation Act, 2021 zulzuia siam a ni. Decembr 4, 2024-a state cabinet meeting chuan temple bulhnaia bawngsa ei khapna dan siam chu siamṭhain puipunna hmun leh restaurant-ah khap tel a ni ta a ni. He thupek siam thar hi eptu lam aṭangin sawiselna a tam hle thung.

CM Sarma chuan kum 2021 khan state assembly chuan bawng humhalhna tur bill chu a lo pawm tawh tih a sawi. Assam Cattle Preservation Act of 2021chuan Hindu, Jain leh Sikh chen tamna bial leh temple/satra aṭanga km 5 huam chhungah bawng talh leh a sa zawrh a khap a ni. Mahse hemi hnu hian he dan hi siamṭhain, khapna dan hi a huang an zuah tir ta tih Chief Minister chuan a sawi.

Assam sorkar thutlukna siam state Rajya Sabha MP, Rameshwawr Teli chuan a t hlawp thu sawiin, lawmawm a tih thu a sawi. BJP hruaitu Pratul Shah Deo pawhin sorkar hmalakna chu a thlawp thu a sawi ve bawk a, hemi rual hian Congress party chu sorkar thutlukna pawm tura tiin, hei hi an zavai atana ṭha tur a nih thu a sawi bawk.

Congress MP Gaurav Gogoi chuan CM Sarma thiltih dan chu BJP election co-incharge a nihna, Jharkhand inthlana BJP a chakpui zawh tak loh a thupna hmanrua a ni tiin, hetiang hian kawng dang zawnga thu thar siam a tum a ni, a ti. Samajwatr Party MP Iqra Hasan chuan Assam-a BJP sorkar chu mimal nuna inrawlhah puhin, hei hi ram danpui kalh anih thu a sawi. All India United Democratic Front (AIUDF) pawhin sorkar chu state tana thil pawimawh zawkte ngaihtuah loah an puh ve bawk a ni.

Congress MLA Sherman Ali Ahmed chuan bawngsa ei khapna chu a sawisel thung a, state sorkarin Rashtriya Swayamsevak Sangh (RSS) thupek a zawmna leh ram danpui a hnualsuatna a ni, a ti. Ram danpui chuan ei leh in bakah thawmhnaw chungchangah pawh mahni duhzawng inbel turin mipuite zalenna a pe a ni, tiin a sawi.