Meghalaya: Shillong-ah luxury Aurika Hotel siam dawn

Meghalaya khawpui, Shillong-ah Meghalaya sorkar leh Lemon Tree Hotel Ltd thawkdun chuan 5-star luxury hotel an siam dawn a, hei hi he khawpuia 5-star hotel panga a awmna tur a ni.

Public-private partnership (PPP) hnuaia an thawh dunnaah, Lemon Tree Hotels Ltd chuan Orchid Hotel thawmṭhat nan leh tihchangtlun nan Rs vbc 124 a pe dawn a, hetah hian room 130 awmna, luxury Aurika Hotel hi siam a ni ang.

Chief minister Conrad K Sangma chuan Nilaini khan Polo, Shillong-ah luxury hotel siamna tur lungphum hi a phum. Chief Minister chuan project thawhdan tur sawiin facility changkang ber hmanga thuam a nih tur thu leh, ramchhung bakah khawvel hmun hrang hrang aṭanga khualzinte a hip tur thu a sawi. Toursim sector-a investment tam tham tak an hmuh hian hna thawh tur nuai khat a siam theih tur thu a sawi bawk.

5-star hotel siamna tur hian Meghalaya Tourism Development Corporation (MTDC) hnenah sum hi hlan a ni ang. Lemon Tree Hotels Ltd hian Rs vbc 5 pe hmasain kumtinin a hman man hi Rs. vbc 2.5 an pe dawn bawk a ni.

Tourism minister Paul Lyngdoh chuan tourism sector ṭhanlen theih dan tur sawiin, kum 2025 hian khualzinte tlawh chak ber an nih tur thu a sawi. Kumina mi 50,000 dawn tlawhtu an neih thu leh, kum thum aṭanga kum li hnuah chuan 60% a a pun theih tur thu a sawi.

Aurika Hotel hi acre 1.15 a zau tur a ni a, kum thum chhunga peihfel hman tura ruahman a ni.