Meghalaya: Climate Summit-ah CM a tel, MoU eng emaw zat ziak

Meghalaya chief minister Conrad K Sangma chu New Delhi-a 2nd Climate Investments and Technology Impact Summit-ah a tel a, an state tana hmasawnna hna thawhna turin Memoradum of Understandings (MoU) eng emaw zat an ziak nghal bawk.

He summit-ah hian sik leh inthlak danglam zel leh, chumi in a nghawng laka technologty hmang hma la lak dan turte ngaihtuah a ni. Sik leh sa inthlak danglam chak veng tura green investment lam kalpui dan turte sawi ho a ni bawk.

Meghalaya tana MoU ziahah hian agricultural productivity tih lenna tura Advance Farming Cluster Project atana Rs vbc 125 dahna tur te, University Campus-a Multlipurpose Convention Centre siamna tura Rs vbc 1,300 dah bakah education leh tourism lam tih changtlunna turte pawh an tel a ni. Hei bakah hian inkalpawhna leh tourism infrastructure tih changtlunna turin Meghalaya Cable Car Ropeway Project siamna turin Rs vbc 500 ruahman a ni.

Natural fertilizer siamh hna thawhna atan Rs vbc 125, Artificial Intelligence technology tih hmasawnna turin Rs vbc 1,500 leh hydro power project thawhna tur Rs vbc 1,000 inremna te an ziak bawk.

Chief Minister Sangma hian Delhi-a a cham chhungin defence minister Rajnath Singh a hmu dawn a, Harijan Colony-a cheng chhungkaw 342 te sawn chhuah chungchang a sawipui ang. Deputy chief minister Sniawbhalang Dhar chuan state sorkarin Shillong-a Harijan Colony-a chengte chu an awmna bul, defence rama sawn chhuab a nih theih dan tur a buaipu mek tih a sawi a, Defence Secretary hnenah pawh ngenna an lo thawn tawh a ni. Meghalaya sorkar hian a hmain Harijan Colony-a chengte hi Bivar Road-a Shillong Municipal Board ramah sawn a tum a, mahse Harijan Panchayat Committee (HPC) chuan chhungkaw tin tan ram square 200 zel an phut avangin an tifel thei lo a ni.